Ամենշաբաթյա տեղեկատվական թողարկումը հնարավորություն է տալիս հետևելու անցած շաբաթվա մշակութային նորություններին:
«Մշակութային ազդագրի» ստեղծագործական խումբն ամեն շաբաթ հեռուստադիտողին է պարզում գրականության, ճարտարապետության, թատրոնի, կերպարվեստի և կինոյի կյանքի արժանահիշատակ իրադարձությունների խճանկարը:
 

Պարբերականությունը՝ ամեն երկուշաբթի,  ժամը 20:00-ին և 22:30-ին
Կրկնությունը՝ երեքշաբթի,  ժամը 08:20-ին և 16:40-ին

Մշակութային ազդագիր 30.12.2019


Մեր նկարահանող խումբը շրջել է մայրաքաղաքի կենտրոնով ու արձանագրել գունեղ պատկերները: Գաբրիել Սունդուկյանի անվան ազգային ակադեմիական թատրոնում դեկտեմբերի 29-ին մեծ պրեմիերա էր. «Ալադին» մանկական, երաժշտական ներկայացումը ամանորյա նվեր է փոքրերին և մեծերին: ‹‹Էրեբունի›› պատմահնագիտական արգելոց թանգարանում նոր ժամանակավոր ցուցադրություն է բացվել: Հայ լուսանկարչության լեգենդար դեմքերից մեկի` Անդրանիկ Քոչարի ծննդյան 100-ամյակի օրը լուսանկարչի թանգարանում նոր ցուցադրություն է բացվել ։ 2019թ-ին Մայր Աթոռ Սուրբ Էջմիածնում, Հայ Առաքելական եկեղեցու տարբեր թեմերում և համայնքներում բազմաթիվ մշակութային միջոցառումներ են կազմակերպվել։ Տարեվերջյան մեր թողարկման համար առանձնացրել ենք առավել արժեքավորներն ու լայն արձագանքի արժանացածները: Մանուկ Աբեղյանի անվան գրականության ինստիտուտը Հովհաննես Թումանյանի տարին ամփոփեց արժեքավոր հրատարակություններով: Լույս է տեսել Թումանյանի կյանքի և գործի տարեգրության երրորդ հատորը՝ 1915-1919 թվականների շրջանը:

Մշակութային ազդագիր 23.12.2019


Բոգոտայում ՅՈՒՆԵՍԿՕ-ի ոչ նյութական մշակութային ժառանգության պաշտպանության մասին կոնվենցիայի միջկառավարական կոմիտեի 14-րդ նիստին ներկայացված «Հայկական տառարվեստը և դրա մշակութային դրսևորումները» հայտը փորձագիտական քննություն է անցել և դրական եզրակացության արժանացել: Հովհաննես Թումանյանի թանգարանը դեկտեմբերի 20-ին ամփոփեց բանաստեղծի ծննդյան հոբելյանական տարին: Երևանի մնջախաղի պետական թատրոնը հաջորդ տարի մշտական հասցե կունենա: Հայաստանի ազգային պատկերասրահի «Արա Սարգսյան և Հակոբ Կոջոյան» տուն-թանգարանի մասնաճյուղում բացվել է «Հայկական Էպոս. խոսքից՝ պատկեր» խորագրով ցուցահանդեսը՝ նվիրված հայկական էպոսի առաջին տպագրության հոբելյանին։ «Զանգակ» գրատանը Նունե Սարգսյանի «Կախարդական կոճակներ» նկարազարդ հեքիաթի շնորհանդեսն էր։ Լեզվի կոմիտեն հորդորում, սովորեցնում է գրական հայերեն խոսել և այդ նպատակով օգտագործում է նաև Ֆեյսբուք սոցիալական հարթակը: Խնկո-Ապոր անվան ազգային մանկական գրադարանում անցկացվեցին նոր գրքերի շնորհանդեսներ, բացվեց մանկապատանեկան գրքերի ցուցահանդես-վաճառք:

 

Մշակութային ազդագիր 16.12.2019


Հայաստանի ազգային պատկերասրահում բացվել է «Արևելքը և հայ արվեստը» ցուցահանդեսը: «Զվարթնոց» պատմամշակութային արգելոց-թանգարանում անցկացվել է «Սենտ Շապելի հարթաքանդակը Զվարթնոց տաճարի վերակազմության ակունքներում» խորագրով միջոցառումը: Գաբրիել Սունդուկյանի անվան ազգային ակադեմիական թատրոնում ՀՀ ԿԳՄՍ նախարարի տեղակալ Արա Խզմալյանը հանդես է եկել տարեկան ամփոփիչ ասուլիսով: Դեկտեմբերի 13-ից 15-ը Հայաստանի ազգային կինոկենտրոնի նախաձեռնությամբ անցկացվեց Կինոարտադրողների համահայկական ֆորում։ Դեկտեմբերի 12-ին «Մոսկվա» կինոթատրոնում տեղի ունեցավ ճապոնական ֆիլմերի փառատոնի բացման հանդիսավոր արարողությունը: Համազգային հայ կրթական եւ մշակութային միության երեւանյան գրասենյակը տարին ամփոփեց «Ես եմ» խորագրով կերպարվեստի, գեղանկարչության եւ քանդակի ցուցահանդեսով: «Մենք ենք՝ մեր մարզը» մանկապատանեկան մարզային մշակույթի օրերի շրջանակում Երևանում հյուրընկալվել էին Լոռու մարզի շնորհալի երեխաները: Կոմիտասի թանգարան-ինստիտուտում տեղի ունեցավ արցախյան պատերազմի ազատամարտիկ, ազատագրական շարժման գործիչ, գրող Դավիթ Սարապյանին նվիրված միջոցառում:

Մշակութային ազդագիր 09.12.2019


Երևանի Մաշտոցի անվան մատենադարանում Հրաչյա Թամրազյանին նվիրված հուշ-ցերեկույթ էր կազմակերպվել: Երեւանում մշտական ցուցադրության են ներկայացված 20-րդ դարի նշանավոր քանդակագործ, նկարիչ Նիկոլայ Նիկողոսյանի աշխատանքները: Ազգագրագետ Լուսիկ Ագուլեցու տուն-թանգարանում «Հայ կնոջ առեղծվածը» խորագրով տարազների բեմադրված ցուցադրություն է եղել: Արձակագիր, բանաստեղծ, գրականագետ Կոստան Զարյանի ժառանգները նրա արխիվն ամբողջությամբ նվիրել են Երևանի մատենադարանին։ Երգիծանկարիչ Սուքիաս Թորոսյանը ներկայացրել է վերջին տարիների իր աշխատանքները: Ալ. Թամանյանի անվան թանգարան-ինստիտուտում բացվել է ճարտարապետ, քաղաքաշինարար և արվեստագետ Միքայել Մազմանյանի 120-ամյակին նվիրված ցուցահանդես: Ընթերցողի սեղանին է դրվել Շառլ Ազնավուրի «Մեղմ շշուկով» գիրքը: Հ. Թումանյանի անվան պետական տիկնիկային թատրոնում ամփոփվել է «Կողք կողքի» երաժշտական ներառական փառատոնը։

Մշակութային ազդագիր 02.12.2019


«Գաֆէսճեան» արվեստի կենտրոնում բացվել է «Տարագիրներ ու երազողներ. 20-րդ դարի սփյուռքահայ գրաֆիկայի համայնապատկեր» ցուցադրությունը:
Գաբրիել Սունդուկյանի անվան ազգային ակադեմիական թատրոնում կայացավ «Թռիչք կկվի բնի վրայով» ներկայացման առաջնախաղը: 
«Մատենադարանի երիտասարդ գիտաշխատողների միավորում» հասարակական կազմակերպության նախաձեռնությամբ  նոյեմբերի 28-ից 30-ն անցկացվել է երիտասարդական 5-րդ գիտաժողովը:
«Զանգակ» հրատարակչությունը և «Զանգակ» գրատունը կազմակերպել էին «Հարրի Փոթերը և Կրակի գավաթը» գրքի շնորհանդեսը: 
Երեւանի խամաճիկների պետական թատրոնում պրեմիերա էր։ «Երեխաները երեխաների համար» ծրագրի շրջանակում ռեժիսոր Ռիմա Հովեյանը բեմադրել է 14-ամյա Արման Խլղաթյանի «Երեք փոքրիկ հեքիաթները»:
Հայ-ռուսական Սլավոնական համալսարանում ցուցադրվել են գեղանկարիչ, քանդակագործ  Արմեն Խոջոյանի կոլաժները:
Ժողովրդական արվեստի կենտրոնում ցուցադրվել են Անժելա և Անահիտ Աբգարյանների  ասեղնագործ աշխատանքները:
 

Մշակութային ազդագիր 25.11.2019


Նոյեմբերի 22-ից 24-ը ՀԲԸՄ-ում անցկացվեց Գրքի երևանյան փառատոնը:
Հովհ. Թումանյանի թանգարանի կրտսեր այցելուները մեծանուն գրողի կյանքին ու գործունեությանը կծանոթանան վերջերս նկարահանված 2D անիմացիոն մուլտֆիլմի միջոցով:
Ե. Չարենցի երևանյան տուն-թանգարանում բացվել է ՀՀ ժողովրդական նկարիչ Անատոլի Ավետյանի անհատական ցուցահանդեսը:
Գրականության և արվեստի թանգարանում նախորդ շաբաթ նշվեց Հայաստանի գրողների միության հիմնադրման 85-ամյակը:
Ժամանակակից արվեստի ցուցասրահում բացվել է նկարիչ Վահե Ափոյանի անհատական ցուցահանդեսը:
Կ. Ստանիսլավսկու անվան ռուսական դրամատիկական թատրոնի խաղացանկը համալրվել է ամերիկացի հայտնի դրամատուրգ Ռիչարդ Բայերի «Խառը զգացմունքներ» կատակերգությամբ:

Մշակութային ազդագիր 18.11.2019


Մաշտոցյան մատենադարանում տեղի ունեցավ «Հրանտ Մաթևոսյան» մշակութային կենտրոն-թանգարանի և գրականության «Ահնիձոր» զբոսայգու էսքիզ-նախագծի շնորհանդեսը։
Երևանի պատանի հանդիսատեսի թատրոնում վերականգնվել և հիմնական խաղացանկ է վերադարձվել ամերիկացի դրամադուրգ Վինո դել Մարի «Հիշիր վաղվա օրդ» ներկայացումը:
Ալեքսանդր Թամանյանի անվան ճարտարապետության ազգային թանգարան-ինստիտուտում բացվել է «Կորուսյալ արվեստ. ճարտարապետական գրաֆիկա» խորագրով ցուցահանդեսը:
Հայրենական մեծ պատերազմի 75-ամյակին ընդառաջ, Հայաստանի ազգային պատկերասրահում մինչև տարեվերջ կգործի «Ծաղիկներ մարտիկներին» խորագրով ցուցահանդեսը:
Հայաստանի նկարիչների միությունում այս շաբաթ երկու ցուցահանդես բացվեց՝ Գագիկ Աբրահամյանի «Երկիր դրախտավայրը» և Նաիրի Գրիգորյանի «Գոհությունը»: 
Նոյեմբերի 11-ից 15-ը Երևանում անցկացվել է  «Կին» միջազգային կինոփառատոնը:
Կրթության, գիտության, մշակույթի եւ սպորտի նախարարությունը մինչև նոյեմբերի 19-ը երկարացրել է «Իմ Սարյանը» համահայկական մանկապատանեկան նկարչական մրցույթ-փառատոնը:
Լույս են տեսել Ֆրանց Կաֆկայի հայերեն հնգհատորյակի առաջին գիրքը, արձակագիր Վահագն Գրիգորյանի «Պողոս-Պետրոս» վեպը:
 

Մշակութային ազդագիր 11.11.2019


«Սարգիս Մուրադյան» պատկերասրահում բացվել է Վարդիթեր Կարապետյանի անհատական ցուցահանդեսը:
Լույս է տեսել Սերգեյ Փարաջանովի «Մաեստրո» պատկերագիրքը։
Երևանի պետական տիկնիկային թատրոնում «Ոզնու մուշտակը» ներկայացման առաջնախաղն էր:
Հայոց ցեղասպանության թանգարան-ինստիտուտում կազմակերպվել էր միջազգային գիտաժողով՝ «Հայերի փրկության գործը Մերձավոր Արևելքում 1915-1923 թթ.» խորագով:
«Հայաստանը չին նկարիչների - Չինաստանը հայ նկարիչների աչքերով» խորագրով ցուցահանդես է բացվել Հայաստանի նկարիչների միությունում:
«Մեկ քառակուսի մետր» թատրոնի և կատարողական արվեստի ամենամյա փառատոնն անցկացվեց նոյեմբերի 7-ից 9-ը:
Նոյեմբերի 5-ից 9-ը Երևանում, ՀՀ մարզերում, Արցախում և Վրաստանում անցկացվեց  «Ռոլան» մանկապատանեկան ֆիլմերի 15-րդ միջազգային փառատոնը:
 

Մշակութային ազդագիր 04.11.2019


Կոմիտասի թանգարան-ինստիտուտում բացվել է «Ուսուցիչը» ժամանակավոր ցուցադրությունը:
Գաբրիել Սունդուկյանի անվան ազգային ակադեմիական թատրոնում ցուցադրվել է «Կարին» ավանդական երգի-պարի խմբի «Ղողանջ հարսանեկան» ներկայացումը:
Ամփոփվել է «ՌեԱնիմանիա» անիմացիոն ֆիլմերի և պատկերապատման արվեստի 11-րդ միջազգային փառատոնը:
Ռուսական արվեստի թանգարանում բացվել է «Ինչպես է ծնվում գլուխգործոցը» ժամանակավոր ցուցադրությունը:
Երևանի «Շեքսպիրյան 14-րդ միջազգային թատերական փառատոնի» մեկնարկը տրվեց Համազգային թատրոնում:
«Մերիդիան» էքսպո կենտրոնում բացվեց «Իմ Սարյանը» խորագրով համահայկական մանկապատանեկան նկարչական ցուցահանդեսը:
«Արև Արթ» ցուցասրահում կին ստեղծագործողները ցուցադրել են իրենց գրքարվեստը և  գրքակարի հայկական ոճը:
Երևանի ավագ դպրոցի աշակերտների համար մեկնարկեց թատերական կրթական նոր ծրագիր՝ «Դասարան պլյուս դասական»:
 

Մշակութային ազդագիր 28.10.2019


Հայաստանի ազգային պատկերասրահում բացվել է «Փրկեալ ձեռագործք հայոց» խորագրով ցուցահանդեսը:
Մեկնարկել է «Ռեանիմանիա» Երևանի միջազգային անիմացիոն ֆիլմերի և պատկերապատման փառատոնը:
«Աղբարիկս. Ազնավուրների ոդիսականը» թատերգության պրեմիերան ֆրանսիացի և ֆրանսահայ արվեստագետները ներկայացրել են Հայաստանում՝ Տիկնիկային թատրոնի բեմում:
«Գրանդ հոթել Երևան» հյուրանոցի 329 համարն այսուհետ կկրի անվանի նկարիչ, քանդակագործ Երվանդ Քոչարի անունը:
Հայաստանի նկարիչների միությունում բացվել է նկարիչ-քանդակագործ Ռոբերտ Մինասյանի քանդակների և նկարների ժամանակավոր ցուցադրությունը:
«Ավրորա» մարդասիրական նախաձեռնության հագեցած շաբաթն ամփոփվեց Տաթևի վանական համալիրում:
«Թումո» ստուդիայի ուսանողներն ամերիկացի հեղինակներ Քեյթի, Լիի և Արայի նախաձեռնությամբ ստեղծել են «Լավաշը», որը հայկական հյուրասիրության ու ավանդական բաղադրատոմսերի մասին պատմող գիրք է:
Հայերեն են թարգմանվել Մարիո Վարգաս Լյոսայի «Խուլիա մորաքույրը և գրչակը» և Քրիստոֆ Ռանսմայրի «Վերջին աշխարհը» վեպերը:
 

Մշակութային ազդագիր 21.10.2019


Հայաստանի Ազգային պատկերասրահում բացվել է «Արարատ. սրբազան լեռը» ցուցահանդեսը:
Հայերեն է թարգմանվել աշխարհահռչակ գործարար և բարեգործ Գալուստ Գյուլբենկյանի մասին պատմող Ջոնաթան Քոնլինի «Պարոն հինգ տոկոս» գիրքը:
Ժամանակակից արվեստի թանգարանում բացվել է լոնդոնաբնակ նկարիչ Արթուր Օշականցու ցուցահանդեսը՝ «Ժամանակի բաբախումը» խորագրով:
Արցախի Շուշի քաղաքում ավարտվել են 19-րդ դարի ճարտարապետական–կրոնական համալիրի՝ Գոհար տիկնոջ վերին մզկիթի վերականգնման աշխատանքները:
Հոկտեմբերի 15-ին և 16-ին Երևանում անցկացվեց  «Բարեփոխելով աշխարհը» կինոյի և հեռուստահաղորդումների անդրանիկ փառատոնը:
Աղվերանում անցկացվեց «Արժեք և գին» երկօրյա աշխատաժողով ՝ՀՀ ԿԳՄՍ նախաձեռնությամբ, Բրիտանական խորհրդի և «Ստեղծարար Եվրոպա» նախագծի աջակցությամբ:
Նախորդ շաբաթ անցկացվեց «Զվարթնոց» հայ երգի մրցույթ-փառատոնի գալա համերգը և մրցանակաբաշխությունը:
Լույս են տեսել Ժոզեֆ Բեդիեի «Տրիստանի և Իզոլդայի սիրավեպը» գիրքը և Ալեքսանդր Բելյաևի «Պրոֆեսոր Դոուելի գլուխը» գիտաֆանտաստիկ վեպը:
 

Մշակութային ազդագիր 14.10.2019


Մաշտոցյան մատենադրանի գիտական մասնաշենքում անցկացվեց Հովհաննես Թումանյանի 150-ամյակին նվիրված միջազգային գիտաժողով՝ «Արևելք–Արևմուտք. Հ. Թումանյանը և հեքիաթի թարգմանության արվեստը» խորագրով:
Հովհաննես Թումանյանի թանգարանում բացվեց «Թուղթ ու թիթեղ կամ մանկության պահնորդները» խորագրով ցուցահանդես:
«Մոսկվա» կինոթատրոնում մեկնարկեց «Պորտուգալիայի օրերը Հայաստանում» կինոփառատոնը:
Ավարտվեց «Հայֆեստ» միջազգային թատերական 17-րդ փառատոնը:
Նկարիչների միությունում բացվել է Գագիկ Ղազանչյանի անհատական ցուցահանդեսը՝ «Ակնթարթային պատկերներ» խորագրի ներքո:
Հայերեն է թարգմանվել Ալեքսիս Օհանյանի «Առանց թույլտվության» բեսթսելլերը: Գրքի շնորհանդեսին ներկա էր նաեւ հեղինակը: