«Եկեղեցական կյանք» լրատվական թողարկումը ներկայացնում է Հայ Առաքելական եկեղեցու գործունեությունը կրթական, մշակութային, հասարակական, առողջապահական և այլ ոլորտներում, անդրադառնում եկեղեցական տոներին, պատմում թեմերին կից գործող հասարակական կառույցների, երիտասարդական շարժումների, հայորդյաց տների գործունեության մասին: Ներկայացնում է Մայր Աթոռ Սուրբ Էջմիածնի հոգևոր ծառայությունը, Հայ եկեղեցու և հայ հավատացյալի համայնքային կյանքը հայրենիքում և արտասահմանյան թեմերում:
Պարբերականությունը՝ ամեն երկուշաբթի և ուրբաթ, ժամը 19:30-ին և 21:30-ին
Կրկնությունը՝ երեքշաբթի և շաբաթ, ժամը 08:00-ին և 10:30-ին
Հեռարձակվում է նաև Հայաստանի հանրային հեռուստատեսության արբանյակային ալիքով: 

Եկեղեցական կյանք 14.02.2019 Տեառնընդառաջ


Հայ առաքելական եկեղեցին ամեն տարի փետրվարի 14-ին, Քրիստոսի Ծնունդից 40 օր անց, նշում է քառասնօրյա մանուկ Հիսուսին տաճար բերելու և Աստծուն ընծայելու տոնը՝ Տեառնընդառաջը: Տոնի նախորդ օրը կատարվում է նախատոնակ: 
Սուրբ Գայանե վանքում կատարվեց Տեառնընդառաջի նախատոնակ:  
Փետրվարի 14-ին Տեառնընդառաջի տոնական պատարագը Էջմիածնի Ս. Գայանե վանքում մատուցեց Տ. Իգնատիոս վարդապետ Մալխասյանը: Կատարվեց նորապսակների օրհնության կարգ: 
Փետրվարի 13-ին Երևանի Սուրբ Գրիգոր Լուսավորիչ մայր եկեղեցում երեկոյան ժամերգությունից հետո սկսվեցին ծիսական արարողությունները: Եկեղեցու բակում հոգևորականների օրհնությամբ վառվեց խորհրդանշական կրակը: Նախատոնակի մասնակիցները վառվող մոմերով վերադարձան տուն:
Փետրվարի 14-ին Երևանի Սուրբ Գրիգոր Լուսավորիչ եկեղեցում տոնական պատարագ մատուցեց Տ. Առնակ քահանա Հարությունյանը, կատարվեց նորապսակների օրհնության կարգ: 
Ջրվեժի Ս. Աստվածածին Կաթողիկե եկեղեցում Հիսուսի՝ Տաճարին ընծայման նախատոնակը համայնքի հավատավորները նշեցին Կյուրեղ քահանա Տալյանի գլխավորությամբ: 
Փետրվարի 13-ին Արագածոտնի մարզի Տեղեր համայնքի Սուրբ Աստվածածին եկեղեցու ուխտավորներն ու հավատացյալ այցելուները նշեցին Տեառնընդառաջի նախատոնակը, իսկ նորապսակ զույգերը եկեղեցու հոգևոր հովիվ Մխիթար քահանա Ահարոնյանից օրհնություն ստացան:
 

Եկեղեցական կյանք 11.02.2019


Ավստրալիայի և Նոր Զելանդիայի հայոց թեմ հովվապետական այցի մեկնած Գարեգին Բ Ամենայն հայոց կաթողիկոսը Սիդնեյից մեկնել է Մելբուռն: Այցը սկսվել է հրաշափառի արարողությամբ: Պատարագից հետո Վեհափառ հայրապետի ձեռամբ բացվել է եկեղեցու հարևանությամբ կանգնեցված խաչքարը:
Սուրբ Սարգսի տոնին նախորդող երկուշաբթի օրվանից՝ փետրվարի 11-ից, սկսվում է Առաջավորաց պահքը: Այն կտևի հինգ օր: Առաջավորաց պահքը հատուկ է միայն հայ առաքելական եկեղեցուն: 
Փետրվարի 9-ին Մադրասի Սուրբ Աստվածածին հայոց եկեղեցում մատուցվել է ուխտի պատարագ: Պատարագիչն էր Արծրուն քահանա Միքայելյանը: 
Կաթոլիկ ու բողոքական Եվրոպայում և ուղղափառ Ռուսաստանում արդեն մի քանի տարի է՝ հավատացյալները էլեկտրոնային փոստով ու հաղորդակցական նորագույն տեխնոլոգիաներով կարող են իրենց անունից աղոթք պատվիրել: Աղոթք պատվիրելու այս մեթոդը չի կիրառվում համացանցի հայկական տիրույթում: Հայ առաքելական եկեղեցին շրջանցել է այս պրակտիկան:
Միջազգային լուրեր-Թանզանիայում միաժամանակ մկրտվել են շուրջ հինգ հարյուր մարդ. զանգվածային մկտրությունը տեղի է ունեցել Կիմամբա քաղաքում, Ս. Գեորգի ուղղափառ եկեղեցում: 
Անդրեյ Ռուբլյովի անվան հին ռուսական արվեստի և մշակույթի թանգարանում բացվել է «Կրակի դրսևորումները քրիստոնեական արվեստում» ցուցադրությունը: Քյոլնի տաճարի տեսուչ Պետեր Ֆյուսսենիխը դիմել է ՅՈՒՆԵՍԿՕ-ին` տաճարաշինությունը համաշխարհային մշակութային ոչ նյութական ժառանգություն ճանաչելու համար: 
ԱՄՆ Նյու Ջերսի նահանգում սկսել են տրամադրել անսեռ ծննդյան վկայականներ: 
 

Եկեղեցական կյանք 08.02.2019


Ամենայն հայոց Գարեգին Բ կաթողիկոսի հովվապետական այցը Ավստրալիայի և Նոր Զելանդիայի հայոց թեմ: 
Տավուշի նորանշանակ մարզպետ Հայկ Չոբանյանը աշխատանքային առաջին օրը սկսել է Հաղարծին վանական համալիր ուխտագնացությամբ: 
Տարեսկզբից ՀԵՀԵՄ կենտրոնական գրասենյակը  նոր հասցե ունի՝ Երևանի Սուրբ Աննա եկեղեցու հարևանությամբ: Ամենայն հայոց կաթողիկոսի տնօրինությամբ նոյեմբերի 30-ից Հայ եկեղեցու համաշխարհային երիտասարդաց միության (ՀԵՀԵՄ) հոգևոր տեսչի և կենտրոնական գրասենյակի տնօրենի պաշտոնը վարում է Տ. Թովմա վարդապետ Խաչատրյանը:
Մայր Աթոռի հրատարակչությունը լույս է ընծայել Մաղաքիա արքեպիսկոպոս Օրմանյանի «Ազգային բանախոսություններ» ժողովածուն, որը կազմել և խմբագրել է Լիլիթ Սարվազյանը:
Աշխարհի խոշորագույն թանգարաններից մեկում՝ Նյու Յորքի Մետրոպոլիտանում, 2018 սեպտեմբերի 22-ից 2019թ. հունվարի 13-ը գործում էր «Արմենիա» ցուցահանդեսը:  Մայր Աթոռ Սուրբ Էջմիածինն արդեն հետ է ընդունել իր գանձերը: Շուրջ 4 ամիս տևած ցուցահանդեսն ավելի քան 230.000 այցելու է ունեցել:
Միջազգային լուրեր- Ամենայն հայոց կաթողիկոսը ցավակցագիր է հղել Միրե Միրա Թահսին Բեգի որդուն և ընտանիքին` եզդիների առաջնորդի մահվան առիթով:
Հռոմի Ֆրանցիսկոս պապը և Ալ Ազհարի Մեծ իմամը եղբայրության և խաղաղության համատեղ հռչակագիր են ստորագրել: 
 

Եկեղեցական կյանք 04.02.2019


Փետրվարի 1-ին հովվապետական այցով Ավստրալիա մեկնած Գարեգին Բ Ամենայն հայոց կաթողիկոսը ժամանեց Սիդնեյ: 
Փետրվարի 3-ին Ամենայն հայոց կաթողիկոսի հանդիսապետությամբ տեղի ունեցավ Ավստրալիայի և Նոր Զելանդիայի հայոց թեմի նորակառույց առաջնորդարանի բացման արարողությունը:
Փետրվարի 3-ին Սուրբ Գայանե վանքում կիրակնօրյա պատարագի ավարտին, ի հիշատակ Սումգայիթի զոհերի, կատարվեց հոգեհանգսյան արարողություն:  
ԵՀԽ հայաստանյան «Կլոր սեղան» հիմնադրամի և ՄԱԿ-ի համագործակցությամբ Ծաղկաձորում մեկնարկեց «Կայուն զարգացման նպատակները և եկեղեցին» համաժողովը: 
Փետրվարի 2-ին Նկարիչների միությունում բացվեց Նորքի հայորդյաց տան սաների «Ի խորոց սրտի» ցուցահանդեսը:
Մայր Աթոռի հրատարակչական բաժինը լույս է ընծայել ճարտարապետ և շինարարական արվեստի պատմաբան, գրքի ձևավորման ճանաչված վարպետ Լիպարիտ Սադոյանի՝ հայոց գրերին նվիրված ուսումնասիրությունը:
 

Եկեղեցական կյանք 01.02.2019


Հունվարի 30-ին Գարեգին Բ Ամենայն հայոց կաթողիկոսը Ավստրալիայի և Նոր Զելանդիայի հայոց թեմի առաջնորդի և թեմական խորհրդի հրավերով հովվապետական այցով մեկնեց Ավստրալիա:
Կոմիտաս վարդապետի ծննդյան 150-ամյակի առիթով Լատվիայում, վարդապետի ծննդյան օրը կհնչի նրա պատարագը՝ Լատվիայի ռադիոյի երգչախմբի կատարմամբ:   Այդ առիթով եռօրյա այցով Հայաստանում էր երգչախմբի գլխավոր դիրիժոր Սիգվարդս Կլյավան:
Հայոց բանակի 27-րդ տարեդարձին, ԱՀԹ-ի նախաձեռնությամբ իրականացվեց «Տաք գուլպա հայ զինվորին» ծրագիրը, որի շրջանակներում Արարատի մարզի բոլոր համայնքները հավաքել էին շուրջ 10.000 զույգ գուլպա: 
Լույս է տեսել պատմական գիտությունների թեկնածու, Մատենադարանի գիտքարտուղար Վահե Թորոսյանի «Հայոց կաթողիկոսական իշխանությունը 11-րդ դարի կեսերից մինչև 12-րդ դարի սկիզբ» մենագրությունը:
Լուրեր թեմերից- Անցյալ շաբաթ Կանադայի Մոնրեալ քաղաքում հայոց թեմի  ներկայացուցիչը մասնակցել է միջեկեղեցական էկումենիկ արարողության, ելույթ է ունեցել Ս. Գրիգոր լուսավորիչ առաջնորդանիստ եկեղեցու «Կոմիտաս» երգչախումբը: 
Վիրահայոց թեմը նույնպես մասնակցել է էկումենիկ աղոթքի`Թբիլիսիի Ս. Աստվածամոր Վերափոխման կաթոլիկ եկեղեցում: Ներկա է եղել նաև Հայաստանի քրիստոնյա կանանց էկումենիկ համաժողովի պատվիրակությունը:
 

Եկեղեցական կյանք 28.01.2019 Հայոց բանակի 27-րդ տարեդարձը


Հունվարի 28-ին Գարեգին Բ Ամենայն հայոց կաթողիկոսը նախագահ Արմեն Սարգսյանի, վարչապետ Նիկոլ Փաշինյանի, Արցախի հանրապետության  նախագահ Բակո Սահակյանի, ՀՀ ԱԺ նախագահ Արարատ Միրզոյանի, Մայր Աթոռի միաբանների հետ այցելել է «Եռաբլուր» զինվորական պանթեոն: Ավելի վաղ, Գարեգին Բ Ամենայն հայոց կաթողիկոսը ուղերձ էր հղել հայոց բանակի օրվա կապակցությամբ: 
Հունվարի 27-ին, Մայր Աթոռ Սուրբ Էջմիածնի Ս. Վարդան և Ս. Հովհաննես մատուռ-մկրտարանում Հայոց բանակի 27-րդ տարեդարձի կապակցությամբ մատուցվեց տոնական պատարագ: Պատարագիչն էր ՀՀ ԶՈՒ հոգևոր առաջնորդ Տ. Վրթանես եպիսկոպոս Աբրահամյանը: Ամենայն հայոց կաթողիկոսի օրհնությամբ և ՀՀ պաշտպանության նախարարի հրամանով այսուհետև ՀՀ զինված ուժերի ծառայողներն իրենց համազգեստին կկրեն «Աշոտ Երկաթի Խաչ» կրծքանշանը: Պատարագից հետո Գևորգյան ճեմարանի հանդիսությունների սրահում կատարվեց պարգևաբաշխություն: 
Հայոց 27-ամյա բանակի գնդերեցները:  
 

Եկեղեցական կյանք 25.01.2019


ԱԺ նորընտիր նախագահ Արարատ Միրզոյանին հունվարի 25-ին Մայր Աթոռ Սուրբ Էջմիածնում ընդունել է Ամենայն հայոց կաթողիկոս Գարեգին Երկրորդը: 
ՀՀ-ում Ուրուգվայի Արևելյան Հանրապետության նորանշանակ արտակարգ և լիազոր դեսպան Կարլոս Զգերբի ֆոն Շտայնմանը հանդիպել է Գարեգին Երկրորդ Ամենայն հայոց կաթողիկոսին: 
Հունվարի 25-ին «Էօրնեկեան» հանրակրթական դպրոցում հայկական բանակի տոնին նվիրված միջոցառմանը հյուրընկալվել էին ՀՀ ԶՈՒ գեներալ մայոր Արցախի հերոս Արկադի Տեր-Թադևոսյանը, գեներալ լեյտենանատ Մուրազ Սարգսյանը և պահեստազորի գնդապետ Գարեգին Գասպարյանը: 
Մայր Աթոռ Սուրբ Էջմիածնի հրատարակչական բաժինը լույս է ընծայել պոլսահայ գրող, հրապարակախոս, խմբագիր-հրատարակիչ Միսաք Գոչունյանի՝ Նարեկացու «Մատյան ողբերգության» գրքի աշխարհաբար առաջին թարգմանությունը:
Արարատի մարզի Արալեզ գյուղի հանրակրթական դպրոցում տեղի ունեցավ «Հոգևոր միտք» խորագրով վիկտորինայի եզրափակիչ փուլը:
Միջազգային լուրեր- Իսրայելում կաթոլիկ եպիսկոպոսների պատվիրակությունը մեղադրում է երկրի իշխանություններին՝ քրիստոնյաների հանդեպ խտրականություն ցուցաբերելու մեջ: 
Պակիստանի գերագույն դատարանը հաստատել է՝ քրիստոնյաների եկեղեցական ամուսնությունները օրինական են: 
Եգիպտոսի ղպտիները իբրև երախտագիտության նշան ստորագրություններ են հավաքում Սուրբ Ծննդյան նախօրեին զոհված ոստիկանի հիշատակին, որը փորձել էր վնասազերծել ղպտի քրսիտոնեական տաճարի տանիքին տեղադրված պայթուցիկ սարքը: 
 

Եկեղեցական կյանք 21.01.2019


Ջրօրհնեքի արարողություն՝ Ա. Խամփերյանցի անվան ռազմական ավիացիոն համալսարանում: 
Եպիսկոպոսական պատարագ՝ Կալկաթայի Ս. Նազարեթ հայկական եկեղեցում: 
Հունվարի 18-ին Երուսաղեմի հայոց միաբանությունը Բեթղեհեմում նշել է Սուրբ Ծնունդը՝ հին տոմարով:
«Էօրնեկեան» դպրոցի սաները Սիլվա Կապուտիկյանի ծննդյան 100-ամյակին նվիրված միջոցառում էին կազմակերպել:
Միջազգային լուրեր- Հռոմի Ֆրանցիսկոս պապը արձակել է Հովհաննես Պողոս Երկրորդի ստեղծած «Էկլեսիա Դեի» հանձնախումբը և փոխել է Սիքստինյան մատուռի երգեցիկ խմբի կարգավիճակը: 
Վերջին մեկ ամսում եգիպտական տարբեր քաղաքների չորս քրիստոնեական համայնք հարձակման է ենթարկվել իսլամիստ ծայրահեղականների կողմից: 
Սիդնեյում հայկական կիրակնօրյա դպրոց է բացվել: 
Օտտավայում ՀՀ դեսպանատանը տնօրհնեքի արարողություն է կատարվել: 
 

Եկեղեցական կյանք 18.01.2019


ՀՀ-ում ՄԱԿ-ի մշտական համակարգող Շոմբի Շարփին և նրան ուղեկցող՝ ՄԱԿ-ի մասնագիտացված գործակալությունների և ծրագրերի պատասխանատուներին հունվարի 17-ին ընդունեց Գարեգին Երկրորդ Ամենայն հայոց կաթողիկոսը:
Շարունակվում են ուսումնասիրվել և վերականգնվել Ս. Էջմիածնի Մայր Տաճարի պատերի որմնանանկարները: Մասնագետները համոզված են, որ վերանորոգման ընթացքում դեռ նոր որմնանկարներ կհայտնաբերվեն:
Գևորգյան ճեմարանում բացվել է «Արարող ձեռքեր» նախագծի 13-րդ ցուցահանդեսը: Երիտասարդ նկարչուհիներ Շուշան Գևորգյանի ու Դիանա Հարությունյանի գեղանկարները կարելի է տեսնել մինչև հունվարի 27-ը:
«Դիալոգ» ՀԿ նախաձեռնությամբ Արարատյան թեմում տեղի ունեցավ «Տոտալիտար արվեստ, դրսևորումները կրոնական կազմակերպություններում» թեմայով քննարկում:
Միջազգային լուրեր- Հունվարի 16-ին Ամանորի և Ս. Ծնննդյան տոների առիթով Երուսաղեմի հայոց պատրիարքարան է այցելել Երուսաղեմի նորընտիր քաղաքապետը: 
Միացյալ Նահանգների փոստային ծառայությունը արգելել է հոգևոր բովանդակությամբ բացիկները: Իրավապաշտպանները դատական հայց են նախապատրաստում ամերիկյան փոստի դեմ:
Լիբիայում արտաշիրիմվել են 2015 թվականին Իսլամական պետության ահաբեկիչների կողմից գազանաբար սպանված Եթովպական ուղղափառ եկեղեցու 34 նահատակների մարմինները` Եթովպիային փոխանցելու համար:
Բեթղեհեմի իշխանությունները պատրաստվում են ուխտավորների և զբոսաշրջիկների համար այցելության հայտերի համակարգ ստեղծել: Սուրբ Երկրում այցելունները ժամեր են անցկացնում հերթերում` Տիրոջ Ծննդյան տաճար մտնելու համար: 
 

Եկեղեցական կյանք 14.01.2019


Նորընտիր խորհրդարանի առաջին նիստին ներկա է գտնվել Գարեգին Երկրորդ Ամենայն հայոց կաթողիկոսը և հայրապետական օրհնության ու պահպանիչ աղոթքի խոսքով արգասաբեր գործունեություն մաղթել պատգամավորների աշխատանքին: 
Հունվարի 13-ին Հայ առաքելական եկեղեցին նշում է Հիսուս Քրիստոսի անվանակոչության տոնը: 
Հունվարի 12-ին Սևանի Վազգենյան հոգևոր դպրանոցում Կաղանդչեքի ավանդական արարողություն էր: 
Սուրբ Ծննդյան տոնական արարողությունները՝ Կալկաթայի հայ համայնքում: 
Մայր Աթոռի և ՀԲԸՄ հովանու ներքո գործող հայորդյաց տների սաները համատեղ համերգով ամփոփեցին Ամանորի և Ս. Ծննդյան միջոցառումները:
Միջազգային լուրեր- Իսրայելում քրիստոնյաների թիվն ավելացել է ներգաղթյալների շնորհիվ, այսօր երկրում շուրջ 175 հազար քրիստոնյա կա: 
Հուվարի 6-ին` ղպտիական Ս. Ծննդի նախօրեին, Եգիպտոսում օծվել է Մերձավոր Արևելքի խոշորագույն քրիստոնեական տաճարը: 
Լիտվայում 2019-ին տոնելու են երկրում առաջին ճիզվիտների գալստյան 450-ամյակը:
Երուսաղեմում տարածում է գտել «պրոքսի-աղոթքների» ծառայությունը, որից կարող են օգտվել Սուրբ երկիր մեկնելու հնարավորություն չունեցողները: 
 

Եկեղեցական կյանք 11.01.2019


Սուրբ Ծննդյան տոնի առթիվ Գարեգին Բ Ամենայն հայոց կաթողիկոսը հանդիպում ունեցավ Մայր Աթոռ Ս. Էջմիածնի կառույցների և բաժինների պաշտոնեության հետ: Նորին սրբությունն իր հայրապետական օրհնությունն ու բարեմաղթանքները հղեց Մայր Աթոռի աշխատակիցներին: 
Հունվարի 10-ին ԵՊՀ-ի ուսանողների նախաձեռնությամբ և խնդրանքով Աստվածաբանության ֆակուլտետների դեկան Անուշավան եպիսկոպոս Ժամկոչյանը տնօրհնյաց կարգ կատարեց համալսարանի մասնաշենքում: 
«Իզմիրլյան» բժշկական կենտրոնում կատարվեց Սուրբ Ծննդյան տնօրհնեքի արարողություն: 
Մայր Աթոռ Սուրբ էջմիածնի հրատարակած 2019թ.-ի ալբոմ-օրացույցի պատկերագրությունը ամբողջապես նվրված է Կոմիտաս վարդապետին:
Մայր Աթոռ Սուրբ Էջմիածնի հովանու ներքո գործող Գյումրու «Թռչունյան տան» սաներին հյուրընկալվել էր «ՅՈՒՆԻՄԱ-Հայաստան» կազմակերպության տիկնիկային թատերախումբը և Մայր Աթոռի Քրիստոնեական դաստիարակության կենտրոնի տնօրեն Զաքարիա ծայրագույն վարդապետ Բաղումյանը: 
Սուրբ Ծննդյան ութօրեքի շրջանում Օձունի հոգևոր հովիվ Վրթանես քահանա Բաղալյանը ջրօրհնայց կարգ կատարեց նաև Արդվիի Սրբանեսի վանքում և Հոռոմայրի Սուրբ Նշան եկեղեցում:
 
 
 
 

2019 թվականը հռչակվել է Ընտանիքի տարի


Հունվարի 6-ին՝ Քրիստոսի ծննդյան և մկրտության տոնին, Գարեգին Բ Ամենայն հայոց կաթողիկոսը հայրապետական իր պատգամը հղեց քրիստոնյա հավատացյալներին և 2019 թվականը հռչակեց Ընտանիքի տարի: