Թադեոս Վարդանյան


Մինչ Վազգենյան դպրանոց ընդունվելը, Թադեոսը սովորել է Փանոս Թերլեմեզյանի անվան քոլեջում: Թադեոսը պատմում է նկարչությունը չթողնելու և հոգևոր ճանապարհն ընտրելու իր որոշման մասին. «Ամեն անգամ Սևանավանք բարձրանալիս բոլորովին այլ զգացողությամբ ու գույներով է կտավը լցվում»:

Հայկն ու Դավիթը


Դավիթն ու Հայկը եղբայրներ են, ամեն կիրակի հաճախում են Մարաշի Սբ. Աստվածածին եկեղեցի, շապիկ հագնում, խորան բարձրանում: Ընտանիքում հաճելի ավանդույթ կա` ճամփորդել Հայաստանով ու ճանաչել իրենց համար դեռ չբացահայտված եկեղեցիները: Եղբայների առօրյան հագեցած է՝ զբաղվում են ձեռքի աշխատանքով, հաճախում «Թումո», զբոսնում Արցախից իրենց տուն տեղափոխված երեխաների հետ:

Հակոբ արքեպիսկոպոս Գլնճյան


Ֆրանց Վերֆելի «Երեմիա. լսեք ձայնը» վեպը գերմաներենից հայերեն է թարգմանել Ուրուգվայի հայոց թեմի առաջնորդ Հակոբ արքեպիսկոպոս Գլնճյանը: Գիրքն արժանացել է ՀՀ գրողների միության «Կանթեղ» մրցանակի: Հակոբ սրբազանը գրական ու թարգմանական արժեքավոր ժառանգություն ունի, թեև շատ համեստ է համարում իր վաստակը: «Ինչ կարողանում ենք ստեղծել, միայն Աստծո շնորհի ու ողորմածության շնորհիվ է»,-ասում է սրբազանը:

Գորիսի դպիրները


Գորիսի Սբ. Գրիգոր Լուսավորիչ եկեղեցու խորանը մանկաշատ է: Տղաները վաղուց ընկերացել են, միասին ուխտի բազմաթիվ ճանապարհներ են անցել: Մեր նկարահանող խումբը մի կիրակի անցկացրեց դպիրների հետ:

Գորիսի երգչախումբը


Գորիսի Սբ. Գրիգոր Լուսավորիչ եկեղեցու երգչախմբում տարբեր տարիքի երեխաներ են հավաքված: Խմբավարն ասում է՝ կարճ ժամանակում սերտել են շարականներն ու արդեն պատարագ են երգում: Փորձեր, ճամփորդություններ, խաղ ու զրույցով են անցնում երեխաների կիրակիները: Մեր նկարահանող խումբը մեկ օր անցկացրեց երգչախմբի հետ:

Սյունիքի Քրդիկանց Սուրբ Աստվածածինը


Քրդիկանց բնակավայրը դարերի պատմություն ունի։ Քուրդիկ իշխանը կառուցում է եկեղեցի՝ Սուրբ Աստվածածին անունով։ 1661թ.-ին եկեղեցին նորոգվում է։ Խորհրդային տարիներին վերածվում է պահեստի։ 1958թ. գյուղը տեղափոխվում է հարավ-արեւելք՝ ներկայի Լեռնաձոր, եւ եկեղեցին մնում է գյուղի միակ կենդանի վկան։ 2022թ. մայիսից սկսվում են պեղումները, մեկ տարվա ընթացքում եկեղեցին վերականգնվում է: 2023-ի սեպտեմբերի 9-ին Քրդիկանց Սուրբ Աստվածածինը վերաօծվում է: Լեռնաձորցիների համար իսկական տոն էր՝ սիրելի սրբավայրը երկրորդ կյանք էր ստացել: Իրենց հույզերով ու պատմություններով կիսվում են լեռնաձորցիները:

Վերաօծվել է Սյունյաց թեմի Սբ. Աստվածածին եկեղեցին


Սյունիքի Քրդիկանց բնակավայրի 17-րդ դարում կառուցված Սբ. Աստվածածին եկեղեցին վերականգնվել և օծվել է:

 

Առինջի Սբ. Հովհաննես եկեղեցու Վահեն


Վահեի համար կիրակիները սպասված ու հետաքրքիր են անցնում, առավոտից ընտանիքը օրն սկսում է Առինջի Սուրբ Հովհաննես եկեղեցում: Վահեն ու հայրիկը շապիկ են հագնում, մասնակցում պատարագին: Հետո միասին մարզվում, թենիս խաղում ու զբաղվում առօրյա գործերով:

ՏաՈւժի դպիրները


ՏաՈւժ դպրոցի սաներից մի քանիսը ցանկություն են հայտնել շապիկ հագնելու և խորան բարձրանալու, Տեր Աբելն էլ սիրով համաձայնել է: Իրենց բազմազբաղ առօրյայի, դասերի, խաղերի, ընկերության ու Տավուշի մասին պատմում են տաուժցիները:

Տեր Վահան քահանա Ազարյան


Ճարտարապետական էսքիզներ, գծանկար, մանրանկարչություն. Տեր Վահանի ստեղծագործական հետաքրքրությունների շրջանակը լայն է: Ամենափոքրիկ էսքիզի կամ նախագծի իրականացում մեծ ոգևորության ու ավելին անելու ցանկության առիթ է:

Սառան


Սառան ամեն կիրակի ընտանիքի հետ այցելում է Նորագավիթի Սուրբ Գևորգ եկեղեցի: Եղբայրը՝ Դավիթը, խորան է բարձրանում, իսկ Սառան երգչախմբում երգում է: Նա արագ սերտել է շարականների երգեցողությունը: Սիրում ու տիրապետում է չինարենին: Երազում է ուսումը շարունակել Չինաստանում:

Անիկն ու Յուրան


Անիկն ու Յուրան Վերին Արտաշատի Սուրբ Աստվածածին եկեղեցում մասնակցում են պատարագներին: Յուրան խորան է բարձրանում, Անիկը երգչախմբում երգում է: Անիկը օգնում է եղբորը, որ խորանի վրա լավ երգի շարականները: Նրանք նոր ընկերներ են ձեռք բերել եկեղեցում, միասին սիրում են խաղալ և ուխտագնացությունների մասնակցել: