Շարքի  հերոսները դպրոցահասակ երեխաներ են՝ իրենց հետաքրքրություններով և հոգսերով: Բայց կա մի բան, որ նրանք անում են մեծ ջանասիրությամբ` շապիկ են հագնում և Խորան բարձրանում. ծառայում եկեղեցում որպես դպիր:   
Յուրաքանչյուր  հաղորդում մի պատմություն է, եկեղեցու հետ հաղորդակցության մի դեպք:
 
Պարբերականությունը՝ երկուշաբթի, ժամը 21:00-ին

Քաջիկը (Ապարան)


Քաջիկի առօրյան փոխվեց, երբ ընկերն առաջարկեց իր հետ շապիկ հագնի և խորան բարձրանա: Ապարանի Սուրբ Խաչի խորանը մանկաշատ է: Ամեն կիրակի պատարագին սիրով ու պատրաստակամ են մասնակցում : Քաջիկը պատմում է, որ լավ ընկերներ են։ Միասին խաղում են, օգնում իրար, ուխտագնացությունների մասնակցում:

Սաղմոսավանքի Սամվելը


Մանուկ դպիր Սամվելը երազում է ճարտարապետ, հոգեւորական դառնալ։ Նա ամեն կիրակի այցելում է Սաղմոսավանք, շապիկ հագնում, օգնում հոգեւորականներին և մասնակցում պատարագին: Ազատ ժամանակ կարդում է ու քառյակներ գրում։

Ռաֆիկը


Մրգավանցի Ռաֆիկը երազում է ընդունվել Գևերգյան ճեմարան և դառնալ հոգևորական։ Նա արդեն երեք տարի է հաճախում է Սբ. Հովհաննես եկեղեցի, շապիկ հագնում, խորան բարձրանում, մասնակցում պատարագներին: Տեր Միքայելի հետ ամեն օր ժամերգություն են անում, տնօրհնեքներ, մկրտության ծեսեր:

Արմինա


Արմինան ամեն կիրակի ծնորների հետ հաճախում է Առինջի Սբ. Հովհաննես եկեղեցի, մասնակցում պատարագներին, երգում՝ երգչախմբում: 44 օրյա պատերազմի ընթացքում գրեթե ամեն օր անցկացրել են եկեղեցում։ Նա եկեղեցում սովորել է շարականներ երգել, սաղմոսներ կարդալ և ձեռք է բերել նոր ընկերներ։ Նրա առօրյան հագեցած ու հետաքրքիր է:

Ռաֆայելը


Ռաֆայելը որոշել է հոգևորական դառնալ: Նա Մասիսի Սբ. Թադեոս եկեղեցում ընկերների հետ շապիկ է հագնում, խորան բարձրանում, մասնակցում պատարագներին: Հատկապես հետաքրքիր են անցնում կիրակի օրերը։ Ընկերներով մաքրում են եկեղեցին, երգում շարականներ, ավելի ուշ խաղում են եկեղեցուց դուրս:

Խոր Վիրապի դպիրները Ամանորի պատրաստություն են տեսնում


Խոր Վիրապ վանքի դպիրների ու երգչախմբի համար այս կիրակին տարբերվող էր: Երգեցին, պարեցին, միմյանց օգնեցին, թոնիրը վառեցին, լավաշ ու տարեմուտի գաթա թխեցին: Ընտանեկան ջերմությամբ ու սիրով լի օրվա ականտեսն էր մեր նկարահանող խումբը:

Սուրենն ու Նարեկը


Սուրենն ու Նարեկը եղբայրներ են, ամեն կիրակի հաճախում են Երևանի Սբ. Աննա եկեղեցի, շապիկ հագնում, խորան բարձրանում: Սուրենը որոշել է ուսումը շարունակել Երուսաղեմում: Մեր նկարահանող խումբը օրն անցկացրեց Սուրենի և Նարեկի հետ՝ շախմատ, զբոսանք, աղավնիների խնամք ու էլի շատ բաներ բացահայտելով տղաների առօրյայում:

Եղեգնաձորի դպիրները


Եղեգնաձորի Սբ. Աստվածածին եկեղեցու դպիրները պատրաստվում են պատարագի, յուրաքանչյուրը գիտի իր անելիքը: Նրանք Տեր Ներսեսի օգնականներն են: Մեր նկարահանող խումբը կիրակին անցկացրեց փոքրիկ դպիրների հետ:

Հայկն ու Դավիթը


Դավիթն ու Հայկը եղբայրներ են, ամեն կիրակի հաճախում են Մարաշի Սբ. Աստվածածին եկեղեցի, շապիկ հագնում, խորան բարձրանում: Ընտանիքում հաճելի ավանդույթ կա` ճամփորդել Հայաստանով ու ճանաչել իրենց համար դեռ չբացահայտված եկեղեցիները: Եղբայների առօրյան հագեցած է՝ զբաղվում են ձեռքի աշխատանքով, հաճախում «Թումո», զբոսնում Արցախից իրենց տուն տեղափոխված երեխաների հետ:

Գորիսի դպիրները


Գորիսի Սբ. Գրիգոր Լուսավորիչ եկեղեցու խորանը մանկաշատ է: Տղաները վաղուց ընկերացել են, միասին ուխտի բազմաթիվ ճանապարհներ են անցել: Մեր նկարահանող խումբը մի կիրակի անցկացրեց դպիրների հետ:

Գորիսի երգչախումբը


Գորիսի Սբ. Գրիգոր Լուսավորիչ եկեղեցու երգչախմբում տարբեր տարիքի երեխաներ են հավաքված: Խմբավարն ասում է՝ կարճ ժամանակում սերտել են շարականներն ու արդեն պատարագ են երգում: Փորձեր, ճամփորդություններ, խաղ ու զրույցով են անցնում երեխաների կիրակիները: Մեր նկարահանող խումբը մեկ օր անցկացրեց երգչախմբի հետ:

Առինջի Սբ. Հովհաննես եկեղեցու Վահեն


Վահեի համար կիրակիները սպասված ու հետաքրքիր են անցնում, առավոտից ընտանիքը օրն սկսում է Առինջի Սուրբ Հովհաննես եկեղեցում: Վահեն ու հայրիկը շապիկ են հագնում, մասնակցում պատարագին: Հետո միասին մարզվում, թենիս խաղում ու զբաղվում առօրյա գործերով: