Հունիսի 11-ին մեկնարկեց Գերագույն հոգևոր խորհրդի ժողովը՝ Ամենայն հայոց կաթողիկոսի նախագահությամբ


Մայր Աթոռում քննարկվում են Հայրենիքի առջև ծառացած արտաքին սպառնալիքներին և ներքաղաքական զարգացումներին, Ս․ Էջմիածնի մայր տաճարի վերաօծմանն ու Մյուռոնօրհնության կազմակերպմանը, եկեղեցական-հայեցակարգային հիմնախնդիրներին առնչվող հարցեր։

Վեհափառ Հայրապետը կանադահայերին հորդորել է բարձրաձայնել Ադրբեջանի վայրագությունների մասին


Տորոնտոյի Սուրբ Երրորդություն հայկական եկեղեցում գումարված Կանադայի թեմի 40-րդ պատգամավորական տարեկան համագումարին Ամենայն Հայոց Կաթողիկոսը հորդոր է ուղղել, որ Կանադայի իշխանությունների առջև բարձրաձայնեն Ադրբեջանի հայահալած քաղաքականության մասին, հիշեցնեն բռնազավթված Արցախի, բռնի տեղահանված հայության, ապօրինաբար պահվող գերիների և Արցախում հայկական մշակույթի ոչնչացման մասին: Համագումարի մասնակիցներին ողջույններ և բարեմաղթանքներ են հղել Կանադայի վարչապետ Ջասթին Թրյուդոն։

Մադրիդի Ալմուդենա մայր տաճարի տարածքում տեղադրվել է հայկական խաչքար


Հոգեգալստյան տոնին տեղի է ունեցել խաչքարի օծման կարգը՝ ձեռամբ Արևմտյան Եվրոպայում Հայրապետական պատվիրակ և Վատիկանում Հայաստանյայց Եկեղեցու ներկայացուցիչ Խաժակ Արք. Պարսամյանի և Մադրիդի Արքեպիսկոպոս մետրոպոլիտ, Կարդինալ Խոսե Կոբո Կանոյի: Նորավանքում Մոմիկի հեղինակած ասեղնագործ խաչքարի նմանությամբ խաչարձանի հեղինակը Արտակ Համբարձումյանն է: Կոթողը տեղադրվել է անցած օգոստոսին` Մադրիդի հայ համայնքի նվիրատվությամբ:

 

Ամերիկահայ անվանի դաշնակահար Շահան Արծրունին ելույթ ունեցել Ջավախքում


Սամցխե-Ջավախքի և Ծալկայի ընդհանուր առաջնորդական փոխանորդության դահլիճում տեղի է ունեցել ամերիկահայ անվանի դաշնակահար Շահան Արծրունու համերգը: Դրանից մեկ օր առաջ նա Ախալքալաքի երաժշտական դպրոցի աշակերտների հետ վարպետության դաս է անցկացրել, որին 16 պատանի է մասնակցել։ Նրանցից երկուսը արվեստագետի առաջարկով ելույթ են ունեցել համերգին: Համերգը կազմակերպվել է ՀՕՖ-ի ու Սամցխե-Ջավախքի և Ծալկայի ընդհանուր առաջնորդական փոխանորդության ջանքերով:

 

Կայացել է երջանկահիշատակ Վարդան Դևրիկյանի վերջին գրքի շնորհանդեսը


Վարդան Դևրիկյանի վերջին գրքի շնորհանդեսը կայացել է նրա 60 ամյակի առիթով: Մայր Աթոռի տպարանի, Հայաստանում առաջին հրատարակչատան հիմնադրման պատմությունը գրել էր դստեր` գիտնական, հետազոտող Շողակաթ Դևրիկյանի հետ: Մոտ մեկ տարի առաջ գիտնականը հեռացավ կյանքից հանկարծահաս հիվանդության պատճառով: Վարդան Դևրիկյանը ժամանակի ամենաբեղուն գիտնականներից է: Նա շուրջ 40 գրքի և 60-ից ավելի գիտական հոդվածների հեղինակ է։

 

Հոգեգալստյան տոնին Սուրբ Պատարագ է մատուցել Պոլսի հայոց պատրիարքը


Պոլսի հայոց պատրիարքարանը Հոգեգալստյան տոնը նշել է Բեյօղլու թաղամասի Սուրբ Երրորդություն եկեղեցում, որտեղ տոնական Սուրբ Պատարագ է մատուցել Պոլսի հայոց պատրիարքը: Հոգեգալստյան տոնի նախօրեին նշվել է նաև պատրիարքական աթոռի 563-րդ տարեդարձը: Այդ կապակցությամբ Պոլսի սուրբ Աստվածածին աթոռանիստ մայր տաճարում կատարվել է ժամերգություն և պատրիարքական մաղթանք:
 

Արցախի թեմը կազմակերպել է «Աղվանքը և Հայ Աղվանից եկեղեցին» խորագրով քննարկում


ԳԱԱ պատմության ինստիտուտում Հայ Առաքելական եկեղեցու Արցախի թեմը կազմակերպել է «Աղվանքը և Հայ Աղվանից եկեղեցին» խորագրով աշխատաժողով - գիտագործնական քննարկումը: 2020-2023 թթ. Մեծ Հայքի Արցախ նահանգը պատմության մեջ առաջին անգամ ամբողջությամբ հայաթափվեց, վտանգվեց հայկական դարավոր հոգևոր մշակութային ժառանգությունը: Ադրբեջանը պետական մակարդակով աննախա¬դեպ մասշտաբի աշխատանք է սկսել Արցախի հայկական կրոնական և պատմամշակութային կոթողների ինքնությունը փոխելու, մի մասն էլ իսպառ վերացնելու ուղղությամբ:

 

Ամփոփ լրահոս 13.05.2024


Լոս Անջելեսի 13 հայկական կազմակերպություն իրենց աջակցությունն են հայտնել «Տավուշը հանուն հայրենիքի» շարժմանը
Եվրոպական 11 երկրի ավելի քան 30 քաղաքում հավաքներ են եղել՝ ի զորակցություն «Տավուշը հանուն հայրենիքի» շարժմանը
Գերմանահայոց Կենտրոնական Խորհուրդը հայտնել է իր անվերապահ աջակցությունը «Տավուշը հանուն Հայրենիքի» շարժմանը
«Տավուշը հանուն Հայրենիքի» շարժումը ձեռնարկել է սահմանադրական ճանապարհով վարչապետին անվստահություն հայտնելու գործընթացը

Ամենայն Հայոց Կաթողիկոսը Հաղթանակի ու խաղաղության տոնի առիթով Ս. Գայանե վանքում պատգամ է ուղղել


Հայ Առաքելական Սուրբ եկեղեցին նշել է Համբարձման տոնը, որի ժամանակ հիշատակվում է նաև 1441-ին կաթողիկոսական աթոռը Սիսից Մայր Աթոռ տեղափոխելու պատմական օրը: Այս տարի շարժական տոնը համընկել է Հաղթանակի ու խաղաղության օրվա հետ: Գարեգին Երկրորդ Ամենայն Հայոց Կաթողիկոսը Հաղթանակի ու խաղաղության տոնի առիթով Ս. Գայանե վանքում պատգամ է ուղղել:

 

Վիրահայոց թեմի երիտասարդներն ուխտագնացության են մեկնել Մառնեուլի շրջանի հայկական գյուղեր


Ուխտավոր Հովսեփ քահանա Հարությունյանը Մեծ Շուլավեր գյուղի Սուրբ Աստվածածին եկեղեցում Սուրբ Պատարագ է մատուցել, որին մասնակցել են նաև տեղացիները, քանի որ եկեղեցին չունի մշտական ծիսակատար հոգևորական։ Ուխտավորները եղել են նաև Կարմիր գյուղի «Սրբոց ավետարանչաց» մատուռում։

 

ԱՄՆ հայոց արևմտյան թեմ է այցելել Հայաստանի նախագահ Վահագն Խաչատուրյանը


Հանդիպումը տեղի է ունեցել Սրբոց Ղևոնդյանց Մայր տաճարի առաջնորդարանում: Թեմակալ առաջնորդ Հովնան արքեպիսկոպոս Տերտերյանի առաջարկով հանդիպումն սկսվել է աղոթքով: Հանդիպմանը Սրբազանն անդրադարձել է եկեղեցի-պետություն գործակցային կապերի կենսական կարեւորությանը, մանավանդ այն ժամանակ, երբ ազգն ու հայրենիքը ենթակա են ամենատարբեր փորձությունների։

 

Պոլսում մեկնարկել են Լուսավորիչ երգչախմբի 95-ամյակին նվիրված տոնակատարությունները


Բեյօղլուի Սուրբ Երրորդություն եկեղեցում պատարագ է մատուցվել, որտեղ երգել է Լուսավորիչ երգչախումբը: 95 տարի առաջ` 1929-ին, Լուսավորիչ դպրաց դաս երգչախումբը կազմավորվել է Ստամբուլի Սուրբ Գրիգոր Լուսավորիչ եկեղեցում: 1944-ին եկեղեցու տարածքը, կից հայկական գերեզմանատունը պետականացվել են, երգչախումբը տեղափոխվել է Էսայան վարժարանին կից Սուրբ Հարություն եկեղեցի և գործել որպես եկեղեցական երգչախումբ: